Nuk e di nëse yjet sundojnë këtë botë,

As nëse letrat –

Të lojës apo tarotit –

Mund të zbulojnë diçka.

Nuk e di nëse të hedhësh zaret

Nxjerr gjë në dritë.

Por as nuk e di

Nëse, duke jetuar ashtu si të shumtit jetojnë,

Mund të arrihet diçka.

Po, nuk e di

Nëse mund t'i zë besë këtij dielli që del përditë,

Vërtetësinë e të cilit askush nuk mund të ma garantojë,

Ose mos do të ish më mirë, për më mirë apo për më rehat,

Të besoj në të tjerë diej –

Prej atyre që ndriçojnë edhe natën, –

Në ndonjë thellësi farfuritëse të gjërave

Që tejkalon ç’mund të rrok...

Për momentin...

(Le t’ja marrim shtuar)

Për momentin...

Kam parmakun e shkallëve të sigurt,

Të sigurt në dorën time –

Parmak që s’më përket

Dhe në të cilin mbështetem teksa ngjitem...

Po ... Ngjitem...

Ngjitem deri këtu:

Nuk e di nëse yjet sundojnë këtë botë...

Shqip: Evi Xhaja